Frábær GAJA

Jæja þá er ég nýkominn af GAJA kynningunni. Þar var smakkaður fjöldinn allur af frábærum vínum frá þessum einstaka framleiðanda sem einblínir frekar á gæði en magn.

Fyrst var smakkað hvítvínið GAIA & REY 1995 (GUY-yah eh rey) Langhe D.O.C. Þetta er chardonnay sem er geymdur á lítið notaðri eik í 6-8 mánuði og þvílíkt nammi. Lyktin var hunang og sítrus en í munni marsipan og aprikósur og gott jafnvægi bæði á sýru og eik. Vægast sagt frábært vín. Einkunn 9,5

Sito Moresco 2004 (SEE-toh moh-RES-koh)Langhe D.O.C. 35% Nebbiolo 35% Merlot35% Cabernet Sauvignon. 18 mánuðir á eik og 6 á flösku skiluðu sér í angan af rauðum berjum og flauelsmjúkt í munni með þónokkurri sýru, svolítið kardó í eftirbragði. Fínt vín einkunn 8,8

Promis 2004 ( PRO-mees) Toscana I.G.T. 55% Merlot 35% Syrah 10% Sangiovese Þetta vín var fjólublátt að lit og ilmaði af kirsuberjum með eik i undirtón. Í munni var það sólríkt og í góðu jafnvægi. Einkunn 8,5

Rennina 2000 ( ray-NEE-nah) Brunello di Montalcino D.O.C.G. Tvö ár á eik og tvö á flösku gaf af sér þroskaða rauða ávexti. Flauelsmjúkt í munni með sætum undirtón og töluverðu tanníni. Einkunn 9,2

Conteisa 1991 (kohn-TAY-zah) Langhe D.O.C.G var 100% nebbiolo sem var kominn með múrsteinsrauðan lit sökum aldurs gaf þó af sér angan af rauðum ávöxtum þó svo að minna hafi farið fyrir þeim í munni. Kannski kominn yfir það léttasta sökum aldurs. Einkunn 7

Barbaresco 2001 (bar-bah-RES-koh) Barbaresco D.O.C.G 100% nebbiolo. 24 mánuðir á eik, dökkrauður að lit og ilmur rauðum og dökkum berjum. Vel uppbyggt vín í munni og flókið bragð og silkimjúk tannín. Þetta vín var alveg tilbúið til drykkju en framleiðandi segir að hægt sé að geyma það í um 30 ár (líklegt að það klárist áður en nær 30 ára aldri) Einkunn 9,7

 Niðurstaða: öll vínin með frábæran karaktar en báru þess merki að sami víngerðarmaðurinn hafi haft sína putta á þeim og á hann heiður skilinn fyrir einstök vín sem enginn unnandi góðra vína ætti að láta fram hjá sér fara.

Athugasemdir

[Fanney Dóra Sigurjónsdóttir, 19.2.2007 kl. 20:26]

Hvernig er vín sólríkt í munni?

[Sveinn Sævar Frímannsson, 19.2.2007 kl. 20:40]

það er naumast áhuginn. Sólrík vín innihalda mikinn ávöxt og eru oft há í alkahóli vegna þess að þau fá mikla sól og þar af leiðandi fyllist berið af þrúgusykri, sem er yfirleitt gerjaður til fulls. Þessi vín verða oft ávaxtamikil, frekar þurr og með sætum undirtón og þá er talað um að vín sé sólríkt í munni.

[Fanney Dóra Sigurjónsdóttir, 19.2.2007 kl. 23:44]

Hvernig er þá rigning í munni? Eða er bara hægt að vera með sólríkt í munni? Hráslagalegt í munni?